![\"\"](\"https:\/\/hoyre.no\/content\/uploads\/sites\/341\/2020\/11\/animasjonlegevakt2.jpg\")
<\/div><\/figure>Som det skulle vera kjent for dei fleste er saka om interkommunal legevakt og etablering av \u00f8yeblikkeleg hjelpsenger p\u00e5 Stord blitt eit viktig tema i denne valkampen og der det sitjande fleirtalet skuldar oss i H\u00f8gre for at dette er eit valkamputspel fr\u00e5 v\u00e5r side.
For dei som har f\u00f8lgt med i politikken dei siste \u00e5ra vil vita betre, all den tid me har stemt i mot denne l\u00f8ysinga fr\u00e5 fyrste dag den blei lansert. I tidligare valperiodar har og sp\u00f8rsm\u00e5let om interkommunal legevakt fr\u00e5 tid til anna dukka opp og der fleirtalet i kommunestyret kvar gong har stemt ned slike forslag. Men i denne valperioden har det politiske fleirtalet endra seg og der Ap, saman med sine allierte, no har g\u00e5tt inn for ei slik interkommunal l\u00f8ysing.
Argumenta som eg ser blir brukt er at det no er komne inn nye krav og retningsliner som gjer det umogleg for B\u00f8mlo \u00e5 f\u00e5 dette til p\u00e5 eiga hand. Like fullt ser me at v\u00e5re nabokommunar som b\u00e5de Austevoll, Tysnes og Kvinnherad har f\u00e5tt dette til og ein skulle tru at det er det same lovverket som gjeld for dei som for oss. Me meiner derfor at kan desse kommunane f\u00e5 dette til, ja d\u00e5 m\u00e5 og me p\u00e5 B\u00f8mlo kunna f\u00e5 dette til.
Det er i debatten og blitt uttalt at dette gjer ein etter klare r\u00e5d fr\u00e5 legane, og d\u00e5 er me nok ved kjernen av denne saka, nemleg at legane over lang tid har \u00f8nska seg ei slik endring og at dei no har f\u00e5tt det politiske fleirtalet over p\u00e5 si side. V\u00e5r p\u00e5stand blir derfor at denne reforma fyrst og fremst st\u00e5r fram som ei reform for legane og ikkje ei reform for v\u00e5re innbyggjarar.
Mange brukar og den d\u00e5rlege kvaliteten som har vore p\u00e5 denne tenesta i tidligare tider som argument for at ein ikkje vil tilbake til ei slik ordning. Det kan me fort bli samde om. B\u00f8mlo H\u00f8gre sin visjon er \u00e5 samle dei kommunale helsetenestene i eit helsefaglig kompetansesenter ved B\u00f8mlo bu og helsesenter. Det vil f\u00f8ra til at me f\u00e5r fleire sjukepleiarar og anna fagpersonell inn i dette fagmilj\u00f8et. Dette vil etter v\u00e5r meining styrke helsetilbodet i kommunen.I alle andre samanhengar der kvalitet er ei utfordring, d\u00e5 set ein inn tiltak for \u00e5 betra denne. Dersom ein skule har d\u00e5rlege, faglige resultat eller det er mykje mobbing p\u00e5 denne skulen, d\u00e5 legg ein sj\u00f8lvsakt ikkje ned heile skulen men jobbar heller med tiltak som kan betra p\u00e5 tilh\u00f8va. Slik m\u00e5 ein og sj\u00f8lvsagt gjera i sp\u00f8rsm\u00e5let om kvalitet p\u00e5 ei legevakt. <\/p>
Oppi denne diskusjonen blei det d\u00e5 litt underleg n\u00e5r Frp sin fremste \u00abv\u00e5pendragar\u00bb i kommunestyret var meir opptatt av at kommunen m\u00e5tte jobba aktivt for at mammografibussen og i framtida m\u00e5tte koma til B\u00f8mlo slik at dei som skulle p\u00e5 ein slik kontroll, ein gong kvar tredje eller femte \u00e5r, slapp \u00e5 kj\u00f8ra turen over til Stord.
Me skal heller ikkje leggja skjul p\u00e5 at denne saka for oss og handlar om noko st\u00f8rre enn berre organisering av legevakt, men og ei organisering av ein framtidig kommunestruktur.
B\u00f8mlo H\u00f8gre er klar p\u00e5 at me meiner B\u00f8mlo skal halda fram som eigen kommune,men d\u00e5 lyt me og ha ein politikk som st\u00f8ttar opp om eit slikt syn, slik at alt av innbyggjarane sitt tenestetilbod som me kan ha i eigen kommunen vert prioritert. Berre slik vil me bli oppfatta som ein robust, attraktiv og sj\u00f8lvstendig kommune i framtida. Alle parti slik eg har oppfatte det i denne valkampen meiner at B\u00f8mlo og i framtida skal best\u00e5 som eigen kommunen, men kan folket stola p\u00e5 slike lovnader n\u00e5r ein ser kva politikk ein driv med p\u00e5 viktige omr\u00e5de ?
I sp\u00f8rsm\u00e5let om politireform g\u00e5r det og an og stilla tilsvarande sp\u00f8rsm\u00e5l. Det ein har sett so langt av den politiske leiing i kommunen er at ein er mest oppteken av kva for politimester ein skal h\u00f8yra til anten det blir Bergen eller Stavanger, men eg h\u00f8yrer ingen som snakkar om at me i dag har eit n\u00e6rpoliti som har kontortid tre dagar i veka og har stengt i fleire m\u00e5nader om sommaren. Eg trur faktisk innbyggjarane v\u00e5re er meir oppteken av \u00e5 f\u00e5 oppretthalda eit fullverdig lensmannskontor,og bryr seg lite om kvar politimesteren har sitt kontor.
Sp\u00f8rsm\u00e5let om legevakt og etablering av \u00f8yeblikkeleg hjelp-senger handlar f\u00f8rst og fremst om politisk mot og vilje til \u00e5 st\u00e5 i mot administrative anbefalingar om at interkommunal l\u00f8ysing vil vera det beste. Det blir i so tilfelle eit sp\u00f8rsm\u00e5l om kven det vil vera best for?
B\u00f8mlo H\u00f8gre har i denne saka hatt fokus p\u00e5 kva me trur vil vera best for innbyggjarane og kommunen v\u00e5r som ein robust og attraktiv eining, og so m\u00e5 me \u00abrigga\u00bb tenestetilbodet slik at det tilfredsstiller alle dei statlege krav, slik som v\u00e5re nabokommunar d\u00e5 tydelegvis har klart \u00e5 f\u00e5 til.
So kj\u00e6re veljar, dersom du meiner at ei fullverdig legevakt er ein viktig del av kommunen sitt helsetilbod til sine innbyggjarane, og du meiner at det er viktig at nokon og i komande valperiode skal jobba for ei slik l\u00f8ysing, ja d\u00e5 b\u00f8r du bruka B\u00f8mlo H\u00f8gre si liste ved dette valet.
Godt val !
Inge Reidar Kallev\u00e5g
Gruppeleiar \/ 3 kandidat
B\u00f8mlo H\u00f8gre
<\/p><\/div>\n