6 gode grunnar til å røyste Høgre i Etne

Her er 6 gode grunnar til å røyste Høgre i Etne:

1. Reiselivskommunen Etne

Me har store attraksjonar i kommunen og i nabokommunar. Dette store potensialet kan utnyttast betre. Etne, med Åkrafjorden og Langfoss som fyrtårn, er utgangspunktet for vidare satsing på destinasjonutvikling, med aktørar på topp internasjonalt nivå. Berekraft skal vera ein raud tråd, og produkt av høg internasjonal kvalitet skal knyttast til denne utviklinga.

2. Gode og trygge vegar

Det er ein samanheng mellom gode kommunikasjonar og næringslivet sine moglegheiter til verdiskaping. Høgre vil ha ei snarleg realisering av Bakka-Solheim. Arm til Bergen vil styrka trafikkgrunnlaget for E134 over Haukeli. Kollektivtilbudet må styrkast. Det gjeld både buss og båt.

3. Etne skal vera ein næringsvennleg kommune

Høgre vil legga til rette for nyskaping og utvikling. Verdiskapinga som skjer i små og mellomstore verksemder, er avgjerande for det lokale velferdstilbodet i kommunen. Me må ha tilgjengeleg næringsareal i attraktive område.

4. Du skal gleda deg til å bli gammal i Etne

Høgre vil arbeida for at det er nok institusjonsplasser til dei som treng det. Grunnbemanninga i pleie og omsorg skal levera tenester av god kvalitet, dvs. ikkje berre dekka dei grunnleggjande behova brukeren har. Du skal bli møtt av kompetent personale, der tenesta har fokus på fagleg oppdatering. Dei tilsette må få stillingsstørrelsar dei kan leva av, og dei skal ha eit godt fagleg og spennande arbeidsmiljø. Ei god grunnbemanning er avgjerande for å få ned sjukefråværet i sektoren.

5. Klima og energi

Me tar mål av oss til å bli ein klimaklok kommune som finn gode løysingar som bidreg til utslippsreduksjon og samstundes kan spara oss for ekstra utgifter. Å legga til rette for produksjon av grøn og fornybar energi er viktig, men vindmølleparkar seier me nei til. Me stiller oss positive til utviding av eksisterande kraftverk og til framtidig skånsom utbygging av vasskraft.

6. Ein skule der elevane trivst og utviklar seg

Høgre vil ha ein kvalitetsskule der elevane får god fagleg og sosial lærdom og utviklar evner og lyst til å ta utfordringar. Høgre har ambisjonar for kvar enkelt elev, med rom for individuelt tilpassa undervisning. Digitale læringsplattformer må vera tilgjengelege på nynorsk. I skulen skal læraren òg føla at han blir sett og følgt opp på ein god måte.